بقلم العربي السيد عمران
رسالة قلب تحييني
تغذيني وترويني
بورده تعطر الدنيا
بطيب حبك فتغنيني
ببسمه صافيه بتقول لي
أنا جنبك تهديني
بهمسة صوت تشاغلني
تغازلني وتشجيني
بدعوه حلوه ألقاها
في وسط الضلمة تهديني
ولما ارحل بحزني بعيد
ألاقيها تناديني
تقول لي فرحتك عندي
ما فيش غيرك يهنيني
باحس بطبطبة إيدك
على كتفي تقويني
باحس بضمتك ليّه
هموم الكون تنسيني
وبرد العمر لو يقسى
بإحساسك تدفيني
وتمسح بالحنان دمعه
على خدي بتكويني
ومهما كان وجع روحي
دوا روحك بيشفيني
مشاعرك دي عبير عمري
رضا نفسي ومني عيني
فياااااه على فرحتي لما
بتيجي تقول وحشتيني
